In t lest van 12de aiw het Emo van Hoezen t klooster Floridi Orti, dij wie ook wel Bloemhof nuimen, opricht. Soamen mit zien oom en noamgenoot kregen zai n stuk grond in t oog. Wie kinnen dat stuk grond beter as Wierem. Premonstratenzer munneken haren dou widde pijen aan en doarom kreeg wier doar in volksmond de noam Widdewierem. Toch kreeg wier in offisiële stukken oet 13de tot 16de aiw allinneg noam Werum of Wierem mit.

Emo is rond 1175 in Fivelgo in Frisia aan oostkaant van Lauwers geboren. Hai komt oet n hoofdelingen geslacht. Dat is n soort van landoadel. Emo studaaierde soamen mit zien bruier Addo: artes liberoales, theologie en kerkelk Romiens recht in Peries, Orléans en Oxford. Emo ( stichter en eerste abt van Bloemhof) schreef Kroniek Floridus Hortus (Bloemhof). Abten Menko en Wieland, dij noa Emo kwamen, hebben der mit nkander veur zörgd dat Kroniek schreven wer. Dizze Kroniek het op n wonderlieke menaaier acht aiwen van oorlogen, plunderns, overstromens en branden overleefd.

Woarom is dizze Kroniek zo belangriek? Dat is deur t fait dat der oet tied van Emo nait veul aan schreven bronnen over binnen. Emo en zien opvolgers loaten op goie wieze leven van doudestieds zain. Hou stoer of zai t haren mit al dij overstromens en noatuurgeweld. Ook schrift Emo over zien twiefels woar aal dij ellèn vandoan kwam. Was t zien schuld of lag t aan wat aans. Ook baauw van t klooster is in Kroniek beschreven worden. Hou lu in waike klaaigrond funderens goud op stee kregen. Dat deden zai zunder aal dij spullen dij lu hedentendoage bruken kinnen. Benoam Emo’s raais noar Rome om vergunnen veur baauw van zien klooster geft oardse en gaistleke omstandegheden oet dij tied weer. Hou waren wegen zummer en winter begoanboar. Wat waren gevoaren van dij tied.

Veur beschrieven van historie en behold van Grunneger streektoal is t slim belangriek, dat Kroniek van t klooster Bloemhof nou ook in t Grunnegers te lezen is. Ale Grunnegers, dij Grunneger toal lezen kinnen, hebben zodounde meer kiek op heur aigen toal en kultuur. t Is ja de geschiedenis dij bie Grunneger kultuur heurt. Dat is leste joaren aal n bult aan schrip west deur veul aktiviteiten in en rond olle ploats van t klooster, doar nou nog n kerk stait.

Vertoaler Sies Woltjer oet Loppersom het doarbie ook n stuk of wat foto’s, oafbeeldens en koarten vonden dai in dizze oetgoave opnomen worden om lu beter te zain loaten woar alles zuk oafspeuld het.