Flaptekst

Sùr Magda Crestian ta pertenesé na e famia religioso di Sùr Virginia; e ta Sùr Virginia su aktuprima. Sùr Magda a nase na Rincon, Boneiru, dia 25 di sèptèmber 1936. El a hasi su entrada den konbento di Sùrnan ‘Franciscanessen’ di Roosendaal dia 24 di novèmber di aña 1958. Sùr a hasi su ‘Eeuwige gelofte’, esta Voto perpetuo, dia 6 di yanüari 1966.

Despues ku Sùr Magda a hasi su Voto perpetuo na Hulanda, el a regresá Kòrsou i a biba na konbento di Alverna te ku ougùstùs di aña 1968.

Djei Sùr a biba i traha na Barber pa tres aña, kaba el a bai Soto for di unda Sùr a sali pa bai biba i traha na Chile kaminda te ku dia di awe Sùr ta biba. Ketu bai Sùr ta trahando duru na Chile pa kumpli ku dedikashon i entusiasmo ku su trabounan komo religioso.

Na Chile, Sùr a biba na konbento di sùrnan na Santiago. Aki e tabata bai den poblashonnan pober kaminda e tabata duna lès di kose. E tabata bisa ku ‘mester siña hende piska i no solamente duna nan piská’.

Na Chile Sùr ta biba i kompartí doló i alegria ku e pueblo. E tin hopi atenshon pa hende.

Sùr Magda tin un karakter emprendedó kombiná ku suavidat i simplesa. Ora e kuminsá ku algu, e ta kab’é. Sùr ta bisa ku esaki e tin di su tata.

Sùr tabata kabes di skol di ‘Escuela Madre Vicencia’. Asina Sùr a sigui traha ku amor pa pueblo di Chile i a bira sùr superior di e sùrnan na Chile.

Despues di a biba na Santiago, Sùr Magda a bai biba na parti sùr di Chile na Chiloé. For di aki Sùr ta traha i dirigí e grupo di sùr na Chile.

Huntu ku otro sùr i laiko, e ta sali den boto chiki i ta pasa di isla pa isla pa hasi mishon. Tambe Sùr Magda ta biaha kontinuamente pa Santiago i otro partinan di Chile kaminda tin skol pa kual e ta responsabel.